新居進度 – Day 20 (笑話一則)

今日豬豬下晝過o左新屋收廳o既牆紙！

我o地都覺得怪嫁喇，叫送貨打俾蔡師傅，但打黎打去都無人聽！

咁豬豬咪唯有自己過去收貨囉！

今晚放工，問豬豬今日到底有無人開工！

豬豬話無喎！

跟住講o左個笑話俾我知！

事緣今日豬豬上到新屋，門口有張紙貼住”陳生，請致電蔡師傅屋企！”

咁豬豬入門口收埋貨，個電話就響喇！

係蔡師傅打黎！

豬豬：”我o岩o岩入o左屋，都諗住打返俾你嫁喇！”

豬豬：”你係咪唔記得拎電話？！”

師傅：”點只呀，今次大過大家樂同大快活喇！”

師傅：”我尋日諗住去清場俾油油師傅，咁咪出去倒垃圾囉，點知度門關埋o左，而你又換o左把鎖，唔似以前咁可以o係出面開得返！”

師傅：”我o個時又無著衫，銀包、電話又o係屋裡面，我都係走落去打電話俾朋友借錢去買返件衫咋！”

師傅：”我又唔記得你電話喎，跟住尋晚諗o左好耐潘生個電話，只係記得6xxxx555，又記唔起中間o個幾個字喎！”

師傅：”我都係o岩o岩記起打去問潘生你個電話咋！”

聽完我即時狂笑！

我諗佢當時個樣都幾狼狽！

銀包電話都無，都唔知佢尋日係點返屋企！

今日豬豬打完俾蔡師傅，蔡師傅即刻o係屋企開車過黎拎返銀包電話！

所以今日咪無人開工囉！

我真係笑爆呀！呢個師傅叔叔真係幾得意！

豬豬跟住話咁證明呢個鎖係work啦，連師傅都俾佢玩到！

我話師傅今日o係屋企等o左你成日電話嫁喇，佢一定好心急o姐，哈！

好彩到最後佢記得阿Q個電話，同埋今日要送牆紙咋，唔係豬豬都唔會上新屋！

不過呢單o野真係笑死我！

叫做裝修期間一個小插曲！

所以雖然今日係無師傅開工，但見蔡師傅咁慘，我都唔會怪佢o既！

希望經過呢件事之後，蔡師傅佢o地會醒目o的，唔會再有下一次啦！

亦都希望佢能夠追返今日無開工o既進度啦，哈！