尋日同飛飛行婚紗展，佢拎o左好多酒樓/酒店資料！
佢終於都放棄o左同老豆爭論，順佢老人家意，因為佢想出年嫁得出！哈！
行完婚紗展之後，兩個男人去o左打桌球，我同飛飛就去行街！
一路行，一路傾o左好多關於感情、婚禮o既o野！
我仲話o左俾佢睇o左我份小禮物係咩添！
佢話真係好特別，好靚，無諗過會收呢類禮物！
佢仲話一定好貴，佢估$20，其實係$8呢！
到時一定o的賓客會拎走喎！
希望真係啦！
跟住就教佢咩係上頭，過大禮，要買o的咩濕濕碎碎o野！
飛飛話最好就係擺cocktail連註冊，唔使煩咁多！
我話其實同你o係酒樓/酒店擺係一樣，婚禮攝錄、化妝、租衫都一樣要！
我話唔好諗咁多啦，你老豆肯俾你擺cocktail先算啦！
宜家佢暫定日子係09年9月19日，o岩o岩舊曆8月初1，又係星期六！
佢都真係幾求其，若真係想呢日，我叫佢去揀個師傅睇o下呢日o岩唔o岩你o地啦！
我同意揀日係做俾老人家睇，咁有師傅講起碼有說服力o的！
佢話一擺酒就好多o野煩，好多o野搞！
我話一定嫁啦，即係好似佢舊年買樓一樣，都搞o左好耐之o麻！
我諗其實係因為我o地美女雀友成員有3個都會o係呢1、2年內結婚，所以佢都想快o的嫁得出！
我o地4個，其實個個都係處於同居或半同居狀態，結唔結婚其實無咩大分別！
好開心我o地4個都可以搵到個可以付託終身，可以共同行埋下半生o既另一半！
我o地4個都各自有唔同o既感情路，睇住個個(包括自己)由以往唔開心o既前一段感情生活，到宜家咁幸福，真係好欣慰、好開心！
佢o地3個都話我o係佢o地之中最sweet o既一個！因為同豬豬好恩愛，好少鬧交！拍o左6年拖都仲可以keep住成日有surprise俾對方！
其實係我o地唔想o係朋友面前咁o姐，大家都會俾面俾大家，唔想令對方無面！
至於surprise，其實呢o的o野個個都識，爭在做唔做o姐！
所以，我幾時都話，你o地個個都咁sweet，咁幸福！
好多o野，唔係做俾人睇，正如尋晚同飛飛傾計一樣，求婚戒指唔係要用黎威，係著重當中意義多過一切！
飛飛話雖然口講要粒大o既，但好多o野，兩個人心照就得！
果然係女人先知女人個心諗咩！
好唔鐘意o的fd問點解豬豬仲未求婚，雖然我知佢o地替我緊張，但好多o野，我明白就得！
我唔需要同你解釋點解佢仲唔求婚，個原因我o地兩個知就得！
兩個人一齊咁耐，我知佢一定會做，係爭在幾時o姐，我唔急，請唔好再迫豬豬同我喇！
迫出黎係無意思嫁o麻！若真係要迫先做，咁做都無o左個背後意思o麻！
飛飛亦都好support我，因為佢好明白我呢！
人生有知己如此，夫復何求呢！
好開心人生裡面有你、你、同你…………呢幾個知己！
珍惜朋友間的關係呀!我鄧你地開心
回覆刪除[版主回覆06/01/2008 22:13:00]我一定會嫁，朋友o係一生中都好重要！
其實求唔求婚又有咩分別呢？都決定咗結婚囉，有咩比結婚呢個一生一世嘅承諾嚟得更難忘同窩心呢？
回覆刪除[版主回覆06/02/2008 07:05:00]我係咁諗，但o的好朋友成日講，搞到我好煩，好似一定要迫我男友做咁！
求婚只係一個儀式，有冇都無所謂，兩個人開心就得！
回覆刪除你同你的朋友感情真好，人大了，朋友好像愈來愈少，而我的朋友經常忙碌，約她們食飯要2至3個月前約，所以咁耐都仲未約到我班姊妹食飯！
[版主回覆06/02/2008 13:22:00]係呀，所以我好珍惜我o地之間o既友誼，我o地keep住1個月食一次飯嫁！
現實d講，求唔求都會結嘅啦，d人唔知對方想唔想結婚先話求婚啫........坦白講，我同我嘅另一半都冇求婚呢樣嘢嘅喎！.....
回覆刪除唔好理d朋友講咁多喇，妳隻豬豬已經係一隻好有責任心嘅未來老公嚟嘅喇，如果求婚係代表誠意嘅.....我諗以今時今日佢對妳同妳屋企嘅負責任程度佢應該已經攞咗滿分啦！係咪？
[版主回覆06/02/2008 13:24:00]誠意.........我知佢有！
講真，佢都為我屋企付出好多，呢個我完全感受到！
其實我係想要個過程，多個物質(即係隻戒指)！
咁講即係妳都介懷佢skip咗呢一part？著重婚姻過程總比結婚過程好呀.....退一步問自己：兩個過程只可以揀一樣嘅，妳會要邊個？
回覆刪除我明白每個人都有自己想擁有嘅嘢，但往往好多都唔成功，要知足先會常樂呀.....................
[版主回覆06/02/2008 20:07:00]其實又唔係話介懷o既，有會更加完美咁囉！
其實我好睇得開，因為我知佢一定會做o麻！不過可能係結婚之後o姐，哈！
完全明白你想講咩，放心喎，我對呢件事其實都唔係咁上心，係同個fd傾開，一時有感而發咋！