新居進度 – Day 1 – 收樓篇

今日終於都收o左樓喇！

約o左10點半，去埋銀行入數交管理費上期、泥頭費，過到去只係10點3！

咁當然無咁傻等到10點半先上去啦！

去到因為無人，所以唔使等就可以即刻辦收樓手續喇！

收樓都仲要簽好多文件，搞到11點先正式可以上到樓！

同我講解o既係個同我差唔多年紀o既女仔，佢一聞就聞到我用邊隻香水，因為佢都係用呢間shop o既香水呢！哈！

跟住同佢一路傾計，一路簽文件！

個過程好鬼開心！

上到樓個女仔話恭喜晒我成為業主喎！祝我一切順利，哈！

由律師出收樓信計，我o地要o係8月9日前搬離宜家間公屋！

上到間屋，好開心，因為終於都黎到我o地o既安樂窩喇！

望出去都好開揚，高過個山，可以望到啟田，向下望可以望到個樹林！

好鐘意個view！

大約11點鐘，豬豬就上到黎會合我喇！

豬豬都好鐘意，係咁欣賞個view！

跟住，今日o既忙碌先真正開始呢！