新居進度 – Day 11

今日終於都去o左新屋睇喇！

廁所浴缸已經拆o左，仲舖好牆身o既磚添！

豬豬好識揀色，同原本o係o的磚都襯色呀！

廁所仲爭個企缸地磚未整！我諗師傅今日會整埋佢！

今日亦都送埋門口玄關位o既磚黎！

真係好正！o個種氣勢無得頂呀！

跟住呀水泥師傅問我o地想點舖，我o地要一塊o係中間，兩邊介細條接埋佢！

水泥師傅話今朝度o左成朝，終於都俾佢諗到廳o的磚應該由邊度開始喎！哈！

全屋牆身已經鏟好底，而燈糟亦都整好o左，係爭安返4盞射燈同光管！

今日亦都揀埋窗台雲石，本來諗住用麻石，但o的色水唔得，所以都係揀返雲石，隻色靚好多！

不過師傅話雲石易花o的，但整落窗台都無問題！

今晚要做o既功課係：

1.      揀窗花

2.      揀油油牆身o既顏色

3.      揀房門噴漆o既顏色

另外，今日亦都去o左官塘睇牆紙！

呢度主題牆紙比旺角平好多，我o地亦都揀到！

我諗大多數都係會o係呢度買，因為真係差成倍嫁！

而個花同我地o係旺角睇到o既都係差唔多！

我o地都揀到媽媽房，廳同房天花，係爭我o地房未揀到o姐！

或者我o地房會出去旺角買！

今日蔡師傅話俾我知要用幾多卷牆紙，等聽日過埋旺角睇完，就叫豬豬下個星期下晝搵日自己去買！

蔡師傅話水泥要做到星期三，之後就會做門同油油，牆紙係最尾o個part！

咁即係話再下個星期頭牆紙先到都無問題！

因為要預返主題牆紙要4日訂貨，所以一定要問清楚o的！

好開心見到間屋有初型喇！

安樂窩又踏前一步喇！

下個星期再去，就可以睇到舖好o既地磚喇！