大表哥婚禮後感

經過尋晚大表哥o既婚禮，總結得出可以改善o既地方如下：

1. 迎賓

要安排男及女家各2-3人坐reception，仲要做迎賓o個o的要識男/女家o既親戚朋友，咁樣可以減少點錯名o既機會

2. 點名名單

一定要記得帶，尋晚男家(即係4姨)o個邊唔記得帶預先整好o既點名冊，搞到要用手寫低

3. 相簿

可能唔係個個鐘意俾婚紗相人睇，但我覺得點都擺一、兩本出黎俾人入黎時睇o下，影得咁靚當然要分享o下俾人啦，同埋可以當做Reception o既裝飾

4. 紅/烈酒

若預得唔係太多，就叫侍應開席前唔好開咁多，最多2-3支就算，唔係到入席後會唔夠俾人飲

5. 安排入席

最好比預定開席時間早半個鐘叫人入席，因為一定會有人亂坐！最好人o地一黎簽名，就話俾人知佢應該坐邊檯，咁樣會減少o的人亂坐o既機會！

另外o的兄弟姐妹一定要幫手睇o下控制o的賓客！仲要識得執生，邊檯唔夠人就自動攝位坐！

6. 司儀

司儀要搵個口齒靈利，最好唔好痴利筋，尋晚個女司儀俾豬豬笑o左幾耐呀！

7. 遊戲

雖然之前係預o左咁多個遊戲，但都要睇住時間，若唔夠時間可以唔玩咁多個，唔使格硬一定要玩晒佢

8. 致詞

致詞唔可以太行，最好o係短短幾句就能夠令賓客感受到你o既誠意！

9. 進場

進場通常都會用花炮，但o的花炮最好用小型，唔使最大最響o個o的，因為放完之後個新娘新郎個頭同o的衫都會佈滿晒紙碎，會好難搞！

同埋進場唔可以行得太快，要有時間俾攝影師影相！

10. 新娘新郎應有態度

新娘或新郎唔可以只係掛住女家或男家親朋戚友，要對所有來賓態度一致！尋晚新娘成晚都望過男家o個邊o的人，even影相時想講句恭喜佢都唔望你，搞到我都唔敢上前同佢講兩句！

其實最好新娘新郎可以安排時間去每檯(除敬酒外)再一次多謝賓客，令賓客唔會覺得你忽視o左佢o地！或者可以o係尾段時間上台再一次多謝佢o地o既來臨！

11. 散席

搵定幾個兄弟姐妹先去執定o野，將所有衫同飲剩o既酒pack好！仲要同酒店/酒樓夾有無人幫手運o的o野上車！                                                                      

12. 兄弟姐妹

兄弟姐妹唔好掛住自己玩，唔好等新娘新郎叫先識出黎幫手！因為新娘新郎當晚未必有時間照顧到每一位賓客，兄弟姐妹要幫佢o地招呼賓客！

呢o的係我o係大表哥度睇返黎可以改善o既地方，希望到我時能夠做好o的！

不過，都有值得學習o既地方o既：

1.      致詞

盡量講出平時唔敢講出口o既說話，盡可能感動到雙方父母同賓客！

2.      酒陣

表哥個酒陣排得好好，一入reception就好有氣勢！就算唔飲，齋睇都夠喇！

3.      控制氣氛

尋晚個氣氛好好，個個都玩得好high(尤其係我o地男家)！我都要諗o下點先可以搞到個氣氛好似尋晚咁先！

下個月20號到我二表哥結婚，等我又去偷o下師先！