倒數18日 – 公司同事接旨

本來諗住星期五先派，但由於媽媽同師姐星期五要返大陸睇廠，而阿米又係今日o係尖沙咀office last day，所以就提早今日派o左帖先喇！

好開心派俾佢o地，第一句就係聽到”嘩，好靚呀！”

佢o地仲話今次做人情大封o的都抵啦，剩係張帖都唔少o野！

小明同師兄仲話張藝謀呀！(因為奧運開幕係用卷軸做主題！)

何生就話係咪張藝謀幫你搞嫁？

伍生開完張帖黎睇仲搞笑，佢係話”2in1佳偶天城夢幻城堡？！係咪遊樂場黎嫁？”

原來好多人都唔知2in1係咩地方，我話似伊甸園o既證婚場地咁囉！

我話若果想知係點o既，咪到時黎觀禮咪得囉，哈！

我仲同伍生講，我知你星期日family day，我預o左三個位俾你嫁喇，哈！

有部份就話做咩呀，蘋果批黎嫁？！

跟住我打俾爸爸，叫佢開完會過黎我個位！

當我俾帖佢時，我叫佢早o的到，佢居然係同返我講”叫我早o的到！”

我話唔通你又就黎？咁我會早o的到嫁喇！

跟住阿Joe可能又搞緊結婚，所以當佢收到我張帖時，就係咁問我o野！

問我張帖幾多錢？又當住好多人面前叫我俾張菜單佢睇！

當時我同媽媽佢o地傾緊計，咁媽媽幫我答”你到o個晚咪知囉！邊有人咁樣叫人俾你睇嫁！”

伍生又答咀咁話”張菜單有一半我有份寫嫁！”

哈，呢個家庭真係無得頂呀！

其實聽到佢o地咁講，又話一定會黎，o個刻真係好開心嫁！

Carmen收完我張帖就send o左個e-mail俾我，話佢一定會到！

連朱姐都話o個日會黎！

我之前預計佢唔會黎嫁，因為之前咁多個同事結婚佢都無去飲呢！

真係超感動！

無諗過我張帖會令到佢o地有咁多話題！

媽媽跟住叫o左我、師姐、師兄同小明一齊傾計！

媽媽係問我想要咩電器喎！

佢話你唔使理幾多錢嫁，總之你開聲就得嫁喇！

當時我真係無expect過佢o地會送結婚禮物囉，仲要任我講！

呢個係今日另一個感動位！

之前好怕會尷尬，但呢班同事實在太搞o野喇，搞到我唔識尷尬呢，哈！

個個都話我好有心機，連張帖都搞咁多details o野，o個一刻真係好開心，因為原來真係有人會留意到！

媽媽仲問我係咪印刷部幫我o係餅咭封後面打個囍字喎，哈！

今日真係驚喜開心無限呢！

不過，呢個只係前奏，當晚份小禮物先係戲肉呢！