新居進度 – Day 26

尋晚o係飛飛屋企通頂完，就返屋企拎埋門後磁石就過新屋喇！

我o地係無訓過直接過去！

因為我知我一訓，就唔肯起身過新屋睇！

我o地返屋企拎o野前去o左樓下大家樂食早餐！

食得好飽呀！

8點半就過到新屋！

新屋廳要油o既牆已經油好油！

係天藍色，真係好光猛，好靚！

房走廊就仲未油好，只係油o左第一次！

而媽媽房o既牆紙已經舖好晒！

我o地房只係舖o左藍天白雲天花，仲爭牆身未舖！

所有門已經噴好晒色，房門係粉紅色，同走廊o既粉藍色牆身好夾，好一個兒童天地feel呢，哈！

走廊閣仔天花會用埋房有剩o既藍天白雲牆紙，但仲未舖好！

廳o既燈糟底已經舖好牆紙同個框已經噴好油！

大約9點倒，有師傅上黎開工喎！

仲估今日無人開工添，估唔到佢o地咁勤力！

今日係輪到繼續剩返o既牆紙同油油部份！

但我o地廳走廊仲爭一卷牆紙，本來要今日買返過黎，但我o地決定聽日先去買！

而個木工師傅就上黎整埋個大鏡o既木框！

我o地視察完，大約9點半就走喇！

點知落到樓下，蔡師傅打黎，佢話o岩o岩到o左，話傾兩句！

佢一見我o地，就話”99倍爆冷！估唔到你o地咁早過黎，你o地唔使訓咩？！”

我話”我o地跟本無訓過，打完通宵牌就過黎喇！”

傾o左兩句，星期二開始蔡師傅會去大陸旅行一個星期，要到再下個星期一先返香港！

佢會o係星期二前搞掂埋個浴屏、所有牆紙、窗花、廚房抽氣扇先去旅行！

跟住星期五應該會有廚房鋁門送黎，咁蔡師傅去完旅行返黎就會裝埋上去！

同埋等我o地拎部抽油煙機上去，等木工師傅開孔就可以裝埋！

咁就可以大功告成喇！

蔡師傅話其實我o地星期四可以開始抺屋，因為只係爭o的好minor o野，唔會整到間屋好污糟喎！

所以我叫強表哥12號黎裝電制同叫明哥裝燈係無錯o既，哈！

宜家先係最心急想睇o下個成品呢！

12號，個topic就會係入伙前倒數喇！