同事？！朋友？！

尋日豬豬好唔開心！

因為返到公司，佢班sales coordinator個所謂大家姐send o左個msn俾豬豬！

佢個message係話佢o地成班sales co都唔黎飲！

o個下豬豬停o左一停！

估唔到唔黎個籍口係因為人o地未來奶奶生日！

生日年年都有，但結婚就一世人一次，豬豬覺得好唔合理囉！

但因為佢o係公司有勢力，所以搞到成班sales co都唔敢黎！

豬豬好唔開心，同佢共事o左都成5年，豬豬當佢係朋友，估唔到佢只係當豬豬係同事！

豬豬話其實知道有個sales co想黎，但由於咁，所以想黎都變o左唔黎得！

不過夜晚佢都有msn豬豬話一定要俾帖佢喎！

所以話，派帖真係可以睇到邊o的係真正朋友呢！

我話佢選擇唔黎係佢o地o既損失，因為當日會有好多、好多驚喜！

同埋以後可以知道點同呢o的所謂同事相處！

好開心豬豬好坦白咁同我講佢唔開心！

豬豬唔開心即係我唔開心，邊個搞到豬豬唔開心即係同我過唔去！

我亦都唔會鐘意同呢o的人做朋友囉！

食到濟o既一日

繼北京樓午餐後，阿米亦都買o左4打西餅返黎請我o地食！

真係飽到呢！

仲要下晝快餐o個邊今日3點半安排o左個試飲”尚品”湯喎！

試晒6款湯！

仲用員工價買o左5張coupon添！

之後媽媽開完會返黎，仲會人俾多張coupon我o地添！

我件西餅都只係食o左一半咋，真係好飽呢！

我買尚品coupon係因為俾豬豬同媽媽試o下好唔好飲呢！

若大家有興趣都試o下丫！

夜晚豬豬過黎陪我搭巴士返屋企！

今日真係好滿足呢！

餞行午餐

今日輪到我o地大伙兒請阿米食飯！

因為阿米同阿ton下個星期將會搬去土瓜灣office！

其實真係好唔捨得！

雖然只係搬office，但共事o左咁耐，真係有o的偒感！

我o地今日又係去北京樓食！

不過今日叫o左好多餸，仲要係食唔晒，要打包！

每人只係要$64，真係勁抵！

都係有兩隻唔使錢o既填鴨食！

今日除o左放假o個o的無黎，成個non-food 人都有去！

以後就無o左阿米o個o的爛gap，無o左阿ton呢個管家仔喇！

真係好期待有一日佢o地返黎尖沙咀呢度呢！

努力中

近排好多人問我緊唔緊張？搞掂晒o的o野未？

我係答”唔緊張！””大把o野未搞！”

話唔緊張就扼人o既，不過唔係好緊張o個隻囉！

其實我都唔知自己仲有咩要搞同未搞！

每日o係公司忙到九彩，返到屋企已經唔想諗o野！

豬豬知我呢排公司好忙，好乖咁去搞結婚o的濕碎o野！

宜家爭o既濕碎o野，我諗到o既係爭：入座咭、檯號咭、rundown、音樂、final fit、成長片段、同攝影師夾rundown、confirm用車時間、花球、坐位表同埋兄弟姐妹o既分工！

其實如果要做晒以上爭o既o野可以好快！

但慘在呢排實在太累喇，放工返屋企完全唔想搞！

加上呢兩個星期又係咁約人出黎派帖，搞到好夜訓，更加無精神去搞！

我同豬豬打算今個星期六、日係休息日，抖o下等自己精神o的，咁之後o個3個星期就可以全力博殺喇！

要努力，目的係為有個美好回憶！

IVE好朋友

今日輪到係IVE同學派帖喇！

出席者有：阿Moe、琪瑛、Candy、Vincent、阿魚同Brenda！

咁當然仲有豬豬同我啦！

最衰阿Jan公司鬼咁多o野做，到最後都係黎唔到！

而阿Tom就因為約o左老婆食飯呢！

不過佢兩個都話搵日出黎接我張聖旨喎，哈！

而李Sir同Miss Chan我安排o左今個星期六返去俾佢o地！

話晒李Sir都識我公司某個阿頭o麻！

仲有仲明同Momoco，就要再約過時間俾佢o地lu！

我o地今晚去o左八月居！

因為應承o左伴娘好耐話同佢食都無去到，今次補返數！

我o地成班又好似以前讀書咁，嘻嘻哈哈！

琪瑛雖然做o左人o地老婆，依然都係玩到咁癲！

無見咁耐，都依然咁真，咁親切，真係好難得！

最感動係阿Moe特登拎大假黎去我個wedding！

年頭係阿Moe主動問我幾時，佢要plan定拎大假！

除o左伴娘外，阿Moe係另一個IVE同學最了解我呢！

真係好開心有班對我咁好o既朋友！

我知道每個朋友對我都好有心，一叫佢o地出黎大部份都唔會say no！

人o地話派帖可以見到邊o的係真正朋友，我完全感受到！

但我身邊全部都係真正朋友呢，哈！

下批將會係舊公司同事接旨lu！

月餅慶功宴

尋晚收到媽媽電話，話今晚聖母請全體幫手做月餅o既同事食飯！

咁媽媽當然叫埋我去啦！

等到7點半，o係公司o既11個人分3架的士去德福！

係去我擺酒o既美心皇宮！

早兩日先見完阿May，估唔到咁快又去幫襯佢！

不過今餐唔使自己錢，哈！

今餐非常豐富呀！

有大閘蟹、蛇羹、好大隻o既瀨尿蝦……….！

仲有幸生私人珍藏o既9年花雕，仲有兩支紅酒同1支白酒！

我o地今晚食得好豐富呀！

真係好多謝聖母呢！

雖然工作辛苦，但o的同事之間相處好好！

加上若做得好，阿頭都會讚兩句丫o麻！

好過以前間公司丫，做得好讚就無，做唔好就係咁鬧！

咁樣做o野先有心機做落去嫁o麻！

下個月又黎月餅開波喇！

唔係因為咁，我都唔使將個honeymoon推到去出年新年呢！

不過，唔理咁多，結埋婚先做到最好lu，哈！

Questionnaire

星期五晚收到Loretta份questionnaire！

Loretta尋日已經打黎追我o地交喇！

但星期六日太多節目，今日先有時間去填！

張questionnaire都幾長，但對於我黎講就無咩難度！

但對於豬豬呢個唔係咁識打中文字o既人黎講，真係有o的難度！

我仲自已寫多好多資料俾佢o地添！

我o個份就完成o左喇，唔知豬豬會幾時完成呢，哈！

我唔等豬豬lu，今晚send o左俾Loretta先！

菜單最終回

同Pauline high完tea，就去九龍灣傾埋個菜單喇！

到最後都係轉o左個餸！

由原來o既帶子，改做蝦球！

宜家蝦球貴過帶子，但阿May佢o地都無再收我o地charge！

呢個菜單起碼比街客平o左1x%！

阿May話賺都唔賺自己同事錢喎，要賺都賺人o地！

呢句最o岩聽，哈！

什麼席前瓜子小食，punch bowl，開瓶費，8磅蛋糕，泊車，雀片耍樂，全場椅套，回門乳豬，祝酒香檳…….都全包！

阿May仲話無論當日我o地擺幾多圍都係會俾晒成個廳我o地添，哈！

不過若果真係要開多幾圍就要預早話俾佢知，因為佢o地要訂魚呢！

但阿May 下個月21-25號放假呢！

因為咁o岩佢個親戚又係11月23結婚，仲要去廣州飲添！

不過佢派o左同佢拍o左10年o既拍檔handle我o個晚o既婚宴！

呢個係何副經理！

終於都confirm埋菜單喇，又向1123邁進多一步喇！

希望到時o的o野食同service，令o的guest滿意啦！

女麻女麻生日

去寫完菜單，跟住就去長沙灣廣場富臨喇！

因為豬豬女麻女麻生日，全部人同佢慶祝呢！

今日好齊人，真係除o左新年之外，今次係最齊人o既一次！

因為連豬豬大表姐夫同二表姐夫都有黎！

同埋琪琪男朋友都有黎到呢！

不過唯一無黎到o既係May姨同May姨丈！

但都有派阿揚黎嫁！

今日係咁問做咩仲唔派帖！

其實一早prepare好晒！

但鬼咩，都唔知寫先生夫人好，定係賢兄呢o的稱呼好！

到最後今日結論係寫先生夫人，因為費事寫錯！

橫掂點都會俾人話，就寫個唔會點出錯o既方式啦！

宜家confirm個稱呼，呢幾日print埋出黎貼，咁下個星期就拎上女麻女麻道喇！

咁親戚o個o的就大功告成喇！

好朋友聚舊

今日下晝約o左Pauline o係又一城high tea！

我o地去o左SimplyLife 食tea！

由4點鐘傾到差唔多7點鐘呢！

期間傾o左好多近排我o地各自發生過o既o野！

原來Pauline呢一年真係經歷過好多o野！

今次傾計，亦都發覺到佢大個o左好多，成熟o左好多！

今日真係好開心同Pauline傾o左咁耐呢！

雖然2年無見，但感覺依然咁close！

呢o的就係好朋友o既感覺喇！

無論幾耐無見，都可以無所不談！

開會後餘慶節目

開完遊戲大會都成8點幾，剩返阿妹、阿芹、阿奀同飛飛！

咁我o地就叫pizza box外賣上黎食！

食完仲同後黎o既姐妹打返4圈添！

今晚唔知食o左咩，無端端都會自摸10番！

連媽媽o係後面都話我跟本係棄糊格都可以自摸清一色！

我自己都無諗過啦，唔好話媽媽丫！

打完都成12點幾，咁佢o地就趕車走lu！

今餐外賣我同豬豬請，費事要佢o地咁辛苦走過黎仲要俾錢食飯啦！

不過我就仲要做功課，因為要寫返今日接新娘遊戲o既minutes 呢！

但因為聽日約o左好朋友派帖兼豬豬女麻女麻生日，夜晚要去食飯，所以份minutes我諗要星期一先可以send返俾班靚靚姐妹lu！

各位姐妹，我會再arrange一次姐妹開會，傾埋接新娘o既o野同分工，先黎個大雜會！

因為個大雜會要等個mc出好o左個婚宴rundown先可以安排呢！

 

接新娘遊戲Confirmed

之前已經有個大綱，經過今日馬拉松式開會5個鐘，所有遊戲玩法同懲罰終於都搞掂晒！

今日約o左3點開會，不過下晝出席者只有：伴娘、阿妹、Chloe妹、飛鳳同阿芹！

因為其他人下晝唔得閒，要晏o的先可以join！

而魚魚就病o左！

陰公，佢成2個星期無放過假喇！

本來大綱有6個games，但由於班姐妹驚唔夠時間玩同每個games時間太短，所以就cancel o左兩個喇！

不過，佢o地係將其餘兩個games溶入o左其他games o既懲罰到！

真係估唔到佢o地咁都諗到，哈！

夜晚6點零，阿奀同飛飛就黎到lu！

佢o地o的懲罰仲勁，真係諗都諗唔到！

真係難為班兄弟喇！

不過有少少擔心，佢o地第一個games o既懲罰，會整嬲班兄弟！

不過佢o地話咁樣會玩得開心o的喎！

而o的games o既玩法亦都有所改良，令到難度增加！

果然係人多好辨事，真係3個劉備勝過一個諸葛亮！

而伴娘仲將呢4個games串埋，令到唔剩只係玩，仲要係有意思o既添！

而道具都準備得七七八八喇！

只係爭有o的係要當日或之前o個日先可以準備！

聽佢o地o的games好似好好玩咁，不過我只可以o係房度睇直播呢！

仲有29日，各兄弟要準備接招喇！

希望朝早佢o地俾我班靚靚姐妹玩完，夜晚唔會令到佢o地返唔到屋企啦，哈！

心情relax 好多

經過尋日搵到個咁professional o既MC，個心當堂定晒！

之前真係擔心o左好耐嫁！

因為我o地o個日係超旺日，好怕搵到個o岩o既但無期！

我覺得婚宴mc係一個好重要o既人物！

因為一場婚宴氣氛熱唔熱鬧，都係全靠mc！

開頭係想一男一女o既，因為感覺可以一唱一和，唔會有dead air先！

但宜家搵到個前dj做mc，就算得佢自己一個，佢都唔會俾個show dead air！

尋晚我同豬豬都覺得會好過搵班兄弟姐妹做！

因為就算平時幾口齒伶俐，到做mc時就會變o左機械人，照稿讀！

最煩o既一樣已經settle down，心情真係好relax！

好似解決o左一樣困o左好耐o既事咁！

我同豬豬可以只係埋首o的濕碎o野，唔使再擔心婚宴要諗咩遊戲，個rundown係點好！

經過尋晚一輪o既brain storming，MC都話我o地之前諗o既idea已經好豐富！

佢仲會因應我o地o既故事同工作，令成個主題even連遊戲都係環繞住我o地，唔會無厘頭玩bingo！

希望加埋佢o既帶領，個show會令人難忘啦！

檯號卡準備篇(二)

由於仲未confirm晒人數，所以檯號卡只可以整住主家席先！

因為人數好影響檯號同檯號名o麻！

今日lunch去o左海港城睇咭紙！

有張顏色好靚，好襯我佈置個tone，但超貴，要成$12一張！

咁整26張咪成$3XX，唔化算！

今晚豬豬去o左竹戰四方城！

所以今晚放工我就去o左屋企附近o既文具店買上次睇中o既咭紙喇！

買o左26張，不過仲要自已modify o下個size呢！

就襯住今晚豬豬出街，我就努力做功課啦！

接新娘遊戲(三)

今日又prepare o左多様道具喇！

呢個係用冒險樂園飛換o既！

有呢樣道具出現，係唔想班兄弟搞到o的衫污漕！

我呢個新娘子都算唔話得啦！

呢o的都幫佢o地諗埋！

不過，尚有唔少道具仲未準備呢！

聽日姐妹團就會開會再brain storm o下點整喇！

各姐妹，聽日準時出席呀！

最後階段 - 倒數1個月

日期：            2008年11月23日

酒席地點：    德福美心皇宮 5時恭候 8時入席

註冊地點：    2in1 佳偶天成 3:30 p.m.註冊儀式開始

婚紗相：        1. 珠海現代經典

                        2. 以馬內利

                        3. 法國

婚禮攝錄：    Picasso Wedding (2p+1v) (已約11月8日夾Rundown)

化妝：            Decor Square – Ashlee (全日) (11月15號再試髮型)

會場佈置：    Decor Square – Loretta

餅咭：            美心 (310張) + 奇華 (32張) + 美心嫁女餅 (8張)

紅酒：            Decor Square – 智利 + 澳洲紅酒 (60支)

烈酒：            Whiskey (8支)

甜洒：            南非非洲豹甜酒 (8支)

小禮物：        總之就係好o野啦！

婚紗晚裝：    盈集坊 (1拖尾wg + 3 eg) (11月20日final fit)

新郎禮服：    君悅禮服軒 – 1黑1白 (11月15日final fit)

裙褂馬褂：    錦發 (1千禧中五福頭褂 + 1馬褂) (11月1日final fit)

晚裝鞋：        金色3吋高踭鞋 (但要買多對做後備)

花車：            棗紅色賓利 + 28座Van (11月7 confirm用車時間)

結婚戒指：    PN + 點睛品

請帖：            心印

觀禮咭：        決定唔整

婚禮雜項：    繡名結婚證書套

                        10支簽名筆

                        檯號卡

                        人名Label

                        入座咭

                        Welcome Board (叫loretta整)

                上頭用品，對聯、囍字貼、出門紅傘、利是封、紅拖鞋、龍鳳跪墊

                        新睡衣

                        進場燈光效果道具

                        代替切蛋糕儀式道具

花球：            2個絲花球 (11月21日拎)

姐妹衫：        傾城婚禮 (伴娘長裙+其他短裙，尚欠1位未揀)

媽咪衫：        傾城婚禮+自購 (外母已揀，奶奶未決定)

婚宴MC：      前電台DJ – Benny Lau (10月23日傾細節)

襟花手花：    姐妹團已買，尚欠主婚人及兄弟襟花 (襟花留待Loretta幫我搞掂)

車頭公仔：    中式牛奶妹+牛奶仔

Girdle：          私人胸間               

婚前檢查：    婚後才做

過大禮：        2008年9月13日 時間：0900-1100

上頭時間：    2008年11月22日 女：11:00-12:00 男：11:00-12:00

Rundown：     只係爭婚宴遊戲節目安排 (最遲10月尾final)

Table Menu： 決定用返酒樓provide o個o的

宴客名單：    男女家已齊

成長片段：    歌及相已備妥 (11月7日左右有得拎)

婚宴歌曲：    已有一大堆，但未confirm (10月內有final decision)            

結婚蛋糕：    酒樓送8磅蛋糕 (10-11月初confirm 款式)

菜單：            未定 (10月26日去確認菜單)   

換新銀紙：    半完成

居住事宜：    藍田

嫁妝：            契爺o既金豬牌，媽咪o既龍鳳鈪

迷你版子孫三寶，龍鳳被同紅喼

敬茶茶壺，衣食碗筷

我倆的婚宴MC – Benny

經過我同豬豬3個月o既努力，都勸唔掂班兄弟姐妹幫手做mc！

好彩Loretta幫手，o係剩返1個月o既時間裡面，幫我o地搵到個mc！

今晚同豬豬放工上Loretta道，同我o地o既mc – Benny 見面！

我o地呢位mc，係前商台DJ，專係做韓國音樂o個個呢！

原來Benny之前係做李克勤婚宴個MC嫁！

話晒係一個DJ，當然唔會俾佢有dead air 啦！

成個過程傾得好愉快，佢o既商台週年晚會遊戲idea，我同豬豬都覺得唔錯！

經過今晚o既見面，我同豬豬好放心將我o地個show交俾Benny呢！

聽日Loretta話send份問卷俾我o地填，但唔準我o地偷睇對方寫咩喎！

因為係用黎俾Benny做構思o既呢！

而Benny亦都會幫我o地負責埋婚宴個rundown同諗遊戲！

叫我o地放心交俾佢！

搵到呢位mc，真係好好彩！

仲要係用朋友價請到DJ幫手，比街價平o左2x%！

真係好、好、好多謝Loretta呢！

希望大家有個難忘o既Milka & Joe Wedding啦！

接新娘遊戲(二)

繼搵o左長手長腳公仔，今日又搵到多樣遊戲道具喇！

原來呢樣咁難搵o既！

不過總算搵到，唔使到時臨急臨忙先黎搵o麻！

個sales仲無端端計平o左俾我添，哈！

伴娘同魚魚，我搵到你o地負責o既遊戲其中一樣道具喇！

Details遲o的先講俾你o地知！

因為怕有人會偷睇到我o地o的機密呢，哈！

婚禮MC

由於之前應承做mc o既兩位兄弟姐妹驚，所以推辭o左做mc！

o個刻真係搞到我o地唔知點好！

得返個幾月時間，你叫我同豬豬點算！

好彩有Loretta幫手咋！

佢以佢o既人際關係，幫我o地搵到mc！

不過，就無端端要使多筆錢去請人做喇！

不過個價已經平o左好多嫁喇！

話晒呢個mc，都係做過dj，閒時都有上過報紙嫁！

豬豬都睇過呢個mc o既片，都覺得唔錯！

聽日約o左mc上Loretta度傾details！

所以婚宴o既遊戲同rundown，可以交俾mc做lu！

我同豬豬又可以煩少樣喇！

希望呢位mc能夠幫我同豬豬個婚宴帶出難忘o既氣氛啦！

Mega Show + 有禮物收

今朝一早9點就要過到會展！

因為同媽媽約o左個商號！

而個商號又o係會展擺booth喎，咪去傾埋o的details 同去行o下個show囉！

點知我搭到去天后，媽媽打黎話宜家先出門口！

就係咁我就等o左成4-5個字喇！

去搵完商號，媽媽先返公司，我就繼續行多陣！

之後就去大新office搵我兩個好同事喇！

我有買手信上去嫁！

原來我都有禮物收返喎，哈！

同我買o既手信一樣，都係o野食黎嫁！

仲約好11月6號晚出黎食牛扒添！

因為有個大姐姐爭我o地兩位小妹妹一餐牛扒呢，哈！

半島Cake

今日伍爺下晝請食cake！

仲要係半島o既cake添！

買o左20件餅，就係咁就無o左隻牛lu！

伍爺請食cake，最主要係媽媽星期四生日呢！

我o地仲會同媽媽擺大壽添！

會有上次伍爺o個個大壽包添！

我o地成team仲一齊影全家福添！

但爭o左個師姐呢！

因為要去捷利開會，所以我o地一家5口係無o左師姐份嫁，哈！

而秘書小姐仲俾o左支紅酒我o地添！

我o地成班一齊食cake，一齊飲紅酒呢！

今日真係好happy呢，哈！

又一多一位撞期喇

今日又收到個消息，有個舊同事有朋友又係同我同一日，仲要o係大陸擺添！

咁佢身為伴郎，當然要陪住新郎啦！

咁即係話又唔黎得喇！

唉…….旺日真係有呢個煩惱！

點解咁多人會同我同一日嫁！

又聽到個壞消息，有o的唔開心呀！

不過我知佢都想黎，但只係分身唔到！

你o地o既心意，我全部都收到嫁！

雖然見唔到我扮得最靚o既一日，哈！

我都祝同我一日o既新人幸幸福福，白頭到老！

致謝詞？！

尋朝同個舊同學msn！

我打o左一句”我會好好珍惜呢份經過咁多甜酸苦辣o既感情！”

跟住舊同學就話呢o的留返同豬豬講喎！

仲叫我一定要當晚多謝完父母之後講！

我話講我一定會講，但我驚我未講完已經變喊包lu！

佢以一個男仔角度去睇，男仔其實都好鐘意人o地窩心o既說話！

同埋能夠得到公開o既承認喎！

其實要講咩已經諗好，但我知到時個腦一定會一片空白！

我份人又特別眼淺喎！

所以，到時講到幾多就幾多lu，哈！

 

半夢半醒

尋晚同媽媽、豬豬三個人玩骰盅！

仲開o左兩支table red wine飲！

玩到成點先去訓！

所以，今日完全o係半夢半醒狀態下工作！

今朝起身有個好特別o既感覺！

覺得好sweet，可能係因為尋晚豬豬講o既說話掛！

豬豬尋晚臨訓前對我講o既o野，我記得好清楚呢！

Sweet Sweet星期日

今日同o左豬豬去o左唱K！

好耐都無同豬豬兩個人去唱喇！

豬豬話要練歌喎，仲話又宜家開始每星期都要去1次呢！

因為我知豬豬婚宴時會唱歌俾我聽！

但豬豬話若練唔返好似之前唱得咁好就唔唱喇喎！

我最鐘意聽豬豬唱歌，因為好好聽！

仲記得o個次同班表兄弟姐妹去唱K，我係咁諗我都無襟伴唱，點解會有許志安把聲！

原來豬豬o係度唱緊，真係唱得勁似嫁！

我問豬豬佢係咪當日會唱歌俾我聽，豬豬叫我唔好問咁多喎，到時就知！

唔想無o左surprise呢，因為我想見到你幸福o既眼淚喎！

真係無佢收呀！

唱完之後去o左飲蛇湯同食糯米飯呢！

好好味嫁！

跟住去啟田冒險樂園玩！

豬豬好叻叻呀，拋第一個金幣就掉到個綠色喇！

所以我o地今日成本效益好高呢！

玩完晒就去吉之島入貨，因為一連三日有95折呢！

我o地買o左羊扒同牛扒返屋企煮呢！

今日節目其實好普通，無咩特別，但個感覺好sweet 呢！

第一批炸彈

第一批炸彈終於都正式派出！

今日約o左我班中六中七同學出黎食飯！

去o左海港城rice paper食！

出席者有Poey、Elsie、阿德、名威、振宇、劉宏、我同豬豬！

雖然咁耐無見，但感覺依舊，依然都係咁親切！

成晚仲傾得好開心添！

唔經唔覺原來都識o左成10年喇！

而豬豬同佢o地都打成一片！

今晚我請客，埋完單時我就派帖喇！

話晒遲o的佢o地都做人情，我請又點話呢！

一拎出黎，個個都話咁特別o既！

其實唔係咩特別o野，只係我o地張帖唔係摺帖！

係聖旨款！

同埋背後印o左我o地個logo！

Poey好醒，仲睇到張餅咭印o左logo同打o左囍字孔！

仲睇到個logo係對豬黎添，哈！

不過今日無預到帖俾劉宏，因為唔太熟，費事以為我貪份人情啦！

而安仔o個張就俾o左Elsie幫我轉交俾佢！

呢班只係第一批中六中七同學！

下個星期一約o左Sufiya食lunch，星期日就約o左Lolita，遲o的仲要約埋大容、Anita、阿豐同Pauline呢！

派埋呢o的咁呢圍就搞掂喇！

辛苦o既派帖工程，宜家先正式開始呢！

是日金價 – 7820

等o左咁耐，終於都回落喇！

其實尋日落到8050時已經有衝動去買！

但可惜豬豬尋晚約o左同事去食飯，所以去唔到買！

但我都同媽媽去o左睇先！

o係周生睇中o左對龍鳳鈪，比之前同豬豬去六福睇o既仲重o的！

但望落去就無六福o個對咁闊身！

但媽媽話六福o個o的龍鳳手工唔靚，周生o個o的靚好多！

尋晚仲驚緊今日金價唔知會唔會升返添！

點知今朝起身，見到金價係7820呀！

我同豬豬都好開心亦都好慶幸尋日唔得閒去買！

今日都係同埋媽媽一齊去睇嫁！

我o地先去周生度睇尋日睇中o既龍鳳鈪！

俾豬豬過目o左先買，豬豬都話好靚，我o地仲做埋VIP添！

之後去謝記再睇，謝記、周生o的service同六福爭好遠囉！

六福o個o的都好似唔係好肯serve你咁o既！

反之謝記同周生就好好多！

尤其係謝記，仲特登幫我o係荃灣店搵我想要o既重量金鈪送過黎俾我o地睇！

又介紹我o地睇o係我o地budget之內o既金飾！

我o地o係謝記又買多一對龍鳳鈪！

呢對係老爺奶奶送o既！

而媽媽仲買多隻金介指俾我添！

媽媽話買埋俾豬豬，但豬豬話唔要喎，全部買俾我就得喇喎！

本來想再去買多對龍鳳鈪，但由於o個度間六福態度太差，所以我o地唔想幫襯佢！

諗住買o下大細，若果聽日keep住或者再跌，就去第二間六福買！

若果升，就可以唔買o既！

買多對就係因為豬豬想我嫁得好好睇睇，有多對我會有面o的喎，哈！

其實有幾多對我都唔介意o既，最重要係我嫁到個好老公o麻！

返到屋企，媽媽亦仲送o左對金耳環同1隻手鈪俾我呢！

隻手鈪係媽媽珍藏黎嫁，佢話佢自己都唔捨得戴呢！

而媽媽亦都有隻好重o既金介指俾豬豬呢！

豬豬好驚訝，因為估唔到佢都會有金器戴呢，哈！

今日金舖之行收獲好豐富呢！

好多謝媽媽、豬豬、未來老爺同未來奶奶呢！