聽日去法國揀衫喇

踏入4月，又要開始準備我o既第三輯，亦都係婚前最後一輯婚紗相o既o野喇！

約o左聽日下晝6點半去揀衫！呢個時間已經係最晏可以去揀嫁喇！

咁無理由特登請日假去揀嫁o麻！

呢輯係酒樓送o既coupon，package價值$5,880！包2套婚紗，1套男禮！

可以揀15款相(不連底片)，有本5”x 5”相簿、20”x 30”簽名綢、20”x 24”油畫(不連框)、5”x 7”相1張+ 8” x 10”相x2張及11”x 14”相1張！

由於之前已經影o左兩輯，呢輯基於影得唔好sign o既心態下，無upgrade到個package！

唔計呢輯，之前兩輯加埋都已經成230張相，8本相簿！

屋企已經有2張大油畫，遲o的收埋第二輯相，總共會有4張油畫！

加埋法國呢張，總數係5張油畫，真係開畫展都得喇！

我諗聽日唔使用好耐去揀衫掛，因為我得兩套婚紗，無晚裝，希望2個鐘之內可以搞掂啦！

今次會揀吊帶款同修身款，唔揀傘裙款喇，費事件件都差唔多啦！

由於影第二輯時個花球唔見o左，都唔知去唔去買過個絲花球好！但我又唔係咁想用喎！

不如剩係帶對公仔去影算啦，橫掂對呢輯都無咩期望！

呢輯就算影得幾靚，都唔會加錢去買相嫁喇！費事屋企成個攝影展咁！

呢個我同豬豬好有共識！

雖然係咁預期，但希望到時真係堅持到啦！