吉之島福祿壽組合

繼尋日出動使錢之後，今日都要出動呢！

今日我o地過o左Mega Box！

先去o左肇順名匯飲茶！

去到Mega Box 1點半，等埋位2點有o野食！

都ok豐富嫁，起碼抵食過之前去御苑皇宴度飲茶呢！

食到好飽飽先係$130！

飲完茶就落去L5中庭度霸位lu！

因為新少林寺3點做promotion呢！

有劉華同陳木勝呀！

我o地個位唔算好近，但都可以叫做近距離見到華仔呢！

老公仲影到好多相添！

老公話新年同我去睇呢套呢！(老公好少話去戲院睇戲嫁！)

我當然歡迎之至啦！

睇完劉華搞到4點就開始出發今日o既目的地 – 吉之島喇！

其實20號上網已經睇到吉之島開始每年一次o既福祿壽組合！

我o地就係要等呢個組合呢！

因為屋企要換過部洗衣機呢！

宜家o個部用o左成十幾廿年喇！

加上攪衫開始唔係幾乾喇，係時候要換喇！

一睇個福o既組合，有我o地想買o既大眼仔！

仲要係金章牌，都OK丫！

跟大眼仔個set仲加埋個Panasonic雪柜！

見屋企個雪柜都用o左成10年喇！

加上呢個Panasonic又大o的！

所以襯大小B出世就順便一次過換埋佢啦！

上網睇好晒o的尺寸，再同老公尋晚o係屋企度個廚房夠唔夠位！

一度簡直係fit晒呢！

本來老公話上網訂，因為會送個熨斗！

但我話想去睇o下實物先confirm會好o的喎！

所以今日就出去Mega Box 吉之島睇順便訂喇！

去Mega Box買係因為Mega Club有分儲呢！

睇o下儲到年尾有咩可以換！

去到睇實物同問個sales 個雪柜o既function都用o左成半個鐘！

之後就去落單lu！

福組合就揀o左個雪柜同大眼仔(配大眼仔要另加$500)！

祿組合就要o左個Sanyo 全高清攝錄機！

本來係空氣清新機同呢個智DV二揀一！

跟住同老公商量過後，都係揀DV！

其實一路係諗住買，因為想拍低大小B o既一舉一動呢！

但如果就咁去買部DC我同老公又覺得好似好sign錢咁！

空氣清新機唔係唔好，但要搵位擺同換filter係一個問題！

大小B出o左世後要好多空間，所以都係唔好擺多舊o野o係屋企會安全o的！

而祿組合有呢個就fit晒我o地啦！

最後壽組合就揀o左寶康達智能煲！

因為宜家用緊個Rasonic燉盅係林太借俾我o地用o既！

話有o左要開始燉o野補o下身！

咁老公見遲o的都要俾返林太佢o地，所以話不如要呢個可以燉o野o既智能煲喎！

揀好晒落完單就去做分期lu，分o左12個月！

由於個雪柜要2月10號後先可以送貨，所以就揀o左2月12號送貨兼安裝洗衣機喇！

o係吉之島買滿$100仲可以加$20換隻Miffy！

我o地換o左2隻，一隻粉紅衫，一隻紅色衫！

大小B一人一隻，放o係BB床頭！

其實我唔係特別鐘意Miffy，只係諗住大小B係兔仔同兔女，所以買黎送俾佢o地o既第一份出世生日禮物！

買完Miffy仲去換埋利是封，總共可以換到5包共100個呢！

o岩o岩好可以用黎封俾公司同事用！

跟住o係家品部行o左一個圈！

見到有我o地想買o既柜！

影底o左o的尺寸，返屋企再度o下位再決定買邊隻！

最後再去埋Mega Club儲分就走lu！

之後搭車返藍田，去埋盞記買特價$38/磅急凍螺頭用黎煲湯！

跟住再去埋惠康，因為今日用Enjoy 咭有95折同埋雙倍印花呢！

去完惠康再去藍田吉之島超市買埋牛仔骨就返屋企煮返lu！

今日真係好充實呢！

老公話大小B都幾幸福，一出世就有咁多新o野用呢，哈！

唔知係咪大小B知道BaBaBe同MaMaMe錫佢o地所以開心呢！

今日兩隻o野成日踢我呢！