二表哥結婚

今日輪到二表哥擺酒！

其實佢同二表嫂o係07年10月已經o係澳洲註o左冊，今日係補擺喜酒！

由於今次唔使去幫手，所以我同媽咪、4姨、4姨丈同細表弟成7點幾先去到！

今日個場係尖東富豪酒店o既金彩酒樓！延開13席，我o地男家佔5席！

入席時好亂，因為男家得5席，我o地o的表兄弟姐妹係唔夠位座！

仲要排坐位係一家家人坐，唔係我o地o的表兄弟姐妹一齊坐！

二表哥無做decro，成個場都係白色，我入到場都突o左一突！

今日無伴娘同伴郎，無成長片段，無婚紗相或油畫，係一個好簡單o既婚宴！

不過今日都叫做有遊戲玩o既，就係bingo喇！

但只係得兩份禮物，好似少o左o的咁喎！

超悶，我o個檯得3個我係識，其他都唔識o既！

我細表弟都係咁講 – 一個字 – 悶！

我成班表兄弟姐妹話到我時唔會分開佢o地坐喎！

哈！我又點會拆散我班咁好o既表兄弟姐妹呢！實安排佢o地坐一圍o既！

經過上次大表哥婚宴，佢o地知我同豬豬好飲得！白蘭地加紅酒，成十杯一o的事都無事！

今日又想同我飲呢！

但今日豬豬無去，所以我都唔同佢o地癲喇，容咩易真係醉o左嫁！

佢o地話喎，到我o個日一定隊我o地喎！哈！

媽媽聽到之後就話，叫我吩咐班兄弟姐妹未開席前好隊我表兄弟喎，唔使等佢開席後隊我o地喎！哈！

今日未來表姐夫都有去，咁當然係俾人迫婚啦！

見佢兩個真係慘！但我話我都俾佢o地玩o左好多次喇，今次點都輪到表姐喇！

最衰聽日要返工，唔係今晚會盡興o的囉！

總結今晚個婚宴，我o係婚禮籌備上面係無得益嫁，因為無地方可以俾我參考到呢！

不過，最大得益係我o地表兄弟姐妹又可以聚埋一齊，一齊玩返晚！